తెలంగాణలో పెరుగుతున్న ఉష్ణోగ్రతలు

• ఎల్ నినో ప్రభావంతో అకాల వేడి
• రెండు రోజుల్లో మరింత పెరిగే అవకాశం
• ప్రజలు అప్రమత్తంగా ఉండాలని సూచన

హైదరాబాద్, సెప్టెంబర్ 28 (తెలంగాణ గర్జన): తెలంగాణ రాష్ట్రంలో సాధారణం కంటే అధికంగా ఉష్ణోగ్రతలు నమోదవుతూ ప్రజలను ఉక్కిరిబిక్కిరి చేస్తున్నాయి. వర్షాకాలం ముగింపు దశలో ఉన్నప్పటికీ రాష్ట్రవ్యాప్తంగా పగటి వేళల్లో ఎండ తీవ్రత పెరిగింది. వాతావరణ పరిస్థితుల్లో చోటుచేసుకున్న మార్పుల కారణంగా అనేక ప్రాంతాల్లో ఉష్ణోగ్రతలు సాధారణ స్థాయిని మించి నమోదవుతున్నాయి. దీంతో ప్రజలు అకాల వేడి ప్రభావంతో ఇబ్బందులు ఎదుర్కొంటున్నారు.
వాతావరణ శాఖ గణాంకాల ప్రకారం రాష్ట్రంలోని పలు జిల్లాల్లో పగటి ఉష్ణోగ్రతలు సాధారణం కంటే 3 నుంచి 4 డిగ్రీల సెల్సియస్ మేర అధికంగా నమోదవుతున్నాయి. నిజామాబాద్, మహబూబ్‌నగర్ జిల్లాల్లో గరిష్ఠంగా 35 డిగ్రీల సెల్సియస్ ఉష్ణోగ్రతలు నమోదవగా, ఇది సాధారణ స్థాయి కంటే నాలుగు డిగ్రీలు ఎక్కువగా ఉండటం గమనార్హం. ఈ పరిస్థితి రైతులు, కూలీలు, బహిరంగ ప్రదేశాల్లో పనిచేసే వారిపై ప్రభావం చూపుతోంది. ఉమ్మడి ఖమ్మం జిల్లాలో కూడా 34 డిగ్రీల సెల్సియస్ ఉష్ణోగ్రత నమోదు కాగా, రాష్ట్ర రాజధాని హైదరాబాద్‌లో సాధారణంగా ఉండాల్సిన 31.8 డిగ్రీల స్థానంలో ప్రస్తుతం 34 డిగ్రీల వరకు ఉష్ణోగ్రతలు నమోదవుతున్నాయి. నగర ప్రాంతాల్లో వాహనాల సంఖ్య, నిర్మాణ కార్యకలాపాలు, వేడిగాలుల ప్రభావం కూడా ఉష్ణోగ్రతల పెరుగుదలకు కారణమవుతున్నాయని నిపుణులు చెబుతున్నారు.
వాతావరణ శాఖ అధికారుల ప్రకారం ఎల్ నినో ప్రభావం కారణంగానే ఈ అసాధారణ ఉష్ణోగ్రతలు నమోదవుతున్నాయి. పసిఫిక్ మహాసముద్రంలో సముద్ర జలాల ఉష్ణోగ్రతలు పెరగడం వల్ల ప్రపంచవ్యాప్తంగా వాతావరణంలో మార్పులు చోటుచేసుకుంటాయని, దాని ప్రభావం తెలంగాణపై కూడా కనిపిస్తోందని వారు వివరించారు. దీంతో పగటి వేళల్లో ఎండ తీవ్రత మరింత పెరుగుతోందని పేర్కొన్నారు.
రానున్న రెండు రోజుల్లో రాష్ట్రవ్యాప్తంగా ఉష్ణోగ్రతలు మరో రెండు డిగ్రీల మేర పెరిగే అవకాశం ఉందని అధికారులు హెచ్చరిస్తున్నారు. ముఖ్యంగా ఉత్తర, దక్షిణ తెలంగాణ జిల్లాల్లో వేడి తీవ్రత మరింత ఎక్కువగా ఉండే అవకాశముందని అంచనా వేస్తున్నారు. పగటి వేళల్లో అవసరం లేకుంటే బయటకు వెళ్లకుండా జాగ్రత్తలు తీసుకోవాలని సూచిస్తున్నారు. అకాల వేడి నేపథ్యంలో చిన్నపిల్లలు, వృద్ధులు, అనారోగ్య సమస్యలు ఉన్నవారు ప్రత్యేక జాగ్రత్తలు పాటించాలని వైద్య నిపుణులు సూచిస్తున్నారు. తగినంత నీరు తాగడం, శరీరంలో నీటి శాతం తగ్గకుండా చూసుకోవడం, ఎండలో ఎక్కువసేపు ఉండకుండా జాగ్రత్తలు తీసుకోవడం అవసరమని పేర్కొంటున్నారు. వాతావరణ పరిస్థితులను ఎప్పటికప్పుడు గమనిస్తూ ప్రజలు అప్రమత్తంగా ఉండాలని అధికారులు సూచించారు.